希望你明白：
唔係話你畀左$100一日就要受好差既對待
而係你要諗, 你畀左$100, support到啲乜野, 而相應地, 你預料可以得到幾快、幾全面、幾以「你」為先既"服務"?
醫院只有一間緊急手術房, 所有非預先預約的手術都係排呢間房
咩叫非預約? 即係龍翔道車禍, 你撞到內臟出血, 觀塘工廈墮lift, 你斷左腳, 你阿媽生唔出, 要劏肚救仔, 仲有人跳樓啦, 斬雞斬斷手指啦, 跳彈床玩bubble soccer撞爆骨啦, 都係排個一條隊
每次我都同病人講得好清楚, 你排緊呢條唯一既隊, 以上既人都係一齊排, 遇到比你危急既病人需要做手術, 就會被打尖, 唔一定今日有得做, 可能明天, 可能後天.
「點解仲未做手術? 我睇過google search話, 如果幾多幾多小時內未補返條筋, 就會喪失幾成功力, 你地係咪負責先?」
一個50歲候生女士斷腳等做手術：
其女：「點解仲未做手術? 又唔畀佢食野, 佢好肚餓喎, 點解唔畀條營養水佢?」(由於病人年輕&過往沒什麼病歷, 醫生不一定會處方生理鹽水畀佢, +-only, 以往都見過好多病人等做手術而沒有鹽水)
母：「幾時到我做手術?」「要等上幾個做完先到你, 連做緊手術個醫生都答你唔到, 我點答到你?」「咁可唔可以叫醫生做快啲?」「醫生同緊你做手術時, 你都唔想佢求其做啦?」「咁今日有冇得做?」「#$*^@你問我十次, 我都係答你十次唔!知!道!」
其女再問：「點解我媽仲未做手術? 佢畀人咁打尖法, 唔公平喎!」我不禁笑問佢「點樣唔公平? 即係叫生仔個d唔好生住??」「er...即係可唔可以叫醫生幫我媽做手術先?」
我深呼吸一下
你走去問隔離床同樣排緊手術既病人, 問下佢畀唔畀你媽做先, 問完再問第二格那病人, 問完再落樓下兩層, 問住外科病房那個阿伯肯唔肯, 既然你都覺得無可能, 點解你要係度不斷為難我?
你畀得$100, 我唔同你計個張好貴既電床, 術前準備如照X光幾錢, 做一張心電圖幾錢, 抽血幾錢, 唔同你計病房裏醫生護士姐姐人工, 唔同你計手術室內幾個醫生一個麻醉科醫生, 要維持環境完全消毒既支出等等, 我淨係同你計, 你手術要裝個implant, 幾多錢?
你係街畀$500做個facial, 都確保唔到件袍有洗過, 瞓落去塊布有換過, 公立醫院畀你既, 一定係即用即棄/出洗, 唔會共用 (好簡單既道理, 佢洗/換成本增加=賺少左, 公院無呢個考慮)不如你去問下私家做一個咁樣既手術要幾錢.
我唔想個世界係有錢先有得醫，冇錢就要死，畀$100就要好冇尊嚴、默默承受好差既待遇，我絕對覺得政府有責任畀好好既醫療服務大眾, 始終醫療係好貴好貴既東西, 非一般人可以負擔，只係，當現時資源如此+你只畀$100時，你可否在當下，合理地要求返相對應的服務
我絕對覺得醫療系統同傳統的士司機一樣，有好大既改善進步空間，if，你畀到足夠資源. 我好歡迎你係下次政府作諮詢時，提出增加醫療撥款，而唔係大大聲同我講「我有交稅喎! 點解我阿媽無呢樣服務! 點解無交稅拎綜援的人反而有! 我有交稅喎!」或者「做咩趕我媽出院! 我要返工日頭無人在家，佢再跌倒係咪你負責呀!」
點解阿媽無人照顧唔係你責任? 唔係你兄弟姊妹責任? 唔係利益傾向商家而未能提供適切安老服務的政府負責? 點解係想騰空病床接收其他病人的護士負責? 我俾你瞓多一日兩日，有乜所謂，我人工又唔會少啲，問題係，沒有需要住院的病人分薄了其他人的資源
又要馬兒好，又要馬兒不吃草
文字：KY
圖：膠膠
Search